Pune Station News:पुणे रेल्वे स्थानकावर प्रवाशांच्या सोयीसाठी सुरू करण्यात आलेली प्रीपेड रिक्षा सेवा बंद होण्याच्या मार्गावर आहे. स्थानिक गुंड प्रवृत्तीच्या रिक्षाचालकांनी निर्माण केलेल्या दहशतीमुळे हा मोठा निर्णय घेण्यात आला आहे. त्यामुळे हजारो प्रवाशांना या सुविधेचा फटका बसण्याची शक्यता आहे.
गुंडगिरीमुळे प्रवाशांना त्रास
प्रीपेड बूथवरून प्रवास करणाऱ्या प्रवाशांना स्थानिक रिक्षाचालकांकडून दमदाटी व धमक्या दिल्या जात आहेत. प्रवाशांना जबरदस्तीने स्वतःच्या रिक्षामध्ये बसवण्याचा प्रयत्न केला जात आहे. याशिवाय, प्रीपेड रिक्षाचालकांनाही धमकावले जात आहे. या सर्व प्रकारांमुळे संस्थेने हा बूथ बंद करण्याचा निर्णय घेतला आहे.
प्रवाशांकडून अव्वाच्या सव्वा भाडे वसूल
दररोज दीड ते दोन लाख प्रवासी पुणे रेल्वे स्थानकावरून प्रवास करतात. या गर्दीचा गैरफायदा घेत काही स्थानिक रिक्षाचालक ५०-६० रुपयांच्या प्रवासासाठी १०० ते २०० रुपये वसूल करत आहेत. हा प्रकार रोखण्यासाठी प्रीपेड रिक्षा सेवा सुरू करण्यात आली होती. मात्र, या सुविधेमुळे लूटमार करणाऱ्या रिक्षाचालकांचे नुकसान होत असल्याने त्यांनी दहशत निर्माण करण्यास सुरुवात केली आहे.
पोलीस प्रशासनाकडून दुर्लक्ष
या संदर्भात अनेकदा स्थानिक पोलीस, वाहतूक पोलीस आणि रेल्वे प्रशासनाकडे तक्रार करण्यात आली आहे. मात्र, यावर कोणतीही ठोस कारवाई झालेली नाही. उलट पोलीस संरक्षण देण्याचे आश्वासन देऊनही कोणतीही सुरक्षा व्यवस्था तैनात करण्यात आलेली नाही. परिणामी, स्थानिक गुंड प्रवृत्तीचे लोक आणखी बेफिकीर झाले आहेत.
पूर्वीही झाली होती सुविधा बंद
ही काही पहिलीच वेळ नाही. यापूर्वीही गुंड प्रवृत्तीच्या लोकांनी प्रीपेड रिक्षा बूथ बंद पाडला होता. त्यामुळे प्रवाशांना पुन्हा अडचणींचा सामना करावा लागेल. प्रशासनाने त्वरित कारवाई न केल्यास पुणे रेल्वे स्थानकावरील प्रवाशांची सुरक्षितता धोक्यात येऊ शकते.
प्रवाशांचे नुकसान टाळण्यासाठी प्रशासनाने पुढाकार घ्यावा
रेल्वे स्थानकावर सुरक्षित आणि विश्वासार्ह प्रवास मिळावा यासाठी प्रीपेड रिक्षा सेवा आवश्यक आहे. पोलिसांनी यावर लवकरात लवकर कारवाई करून या सुविधेला संरक्षण द्यावे, अन्यथा प्रवाशांचे मोठे नुकसान होऊ शकते.
