पुणे पोलिसांनी अंबेडकर नगर, गल्लीनंबर ४ येथे बेकायदेशीर गॅस रिफिलिंगचा पर्दाफाश करत एका आरोपीला अटक केली. मार्केटयार्ड पोलिसांनी छापा टाकून गॅस रिफिलिंगचे सर्व साहित्य जप्त केले.
बंदी नवाज उर्फ सलीम गुलाब शेरीकर (३५) असे अटक केलेल्या आरोपीचे नाव आहे. तो मोठ्या घरगुती गॅस सिलिंडरमधून लहान सिलिंडरमध्ये गॅस भरण्याचे धोकादायक आणि बेकायदेशीर काम करत होता. पोलिसांनी घटनास्थळी गॅस रिफिलिंगसाठी लागणारे सर्व साहित्य जप्त केले असून, हे साहित्य दावल एंटरप्रायझेसच्या मालकीचे असल्याचे आढळले.
मार्केटयार्ड पोलिस ठाण्याच्या वरिष्ठ पोलीस निरीक्षक मनीषा पाटील यांच्या नेतृत्वाखालील पथकाने ही कारवाई केली.
या प्रकरणी आरोपीविरुद्ध मुंबई पोलीस कायदा कलम २८७ आणि २८८ तसेच अत्यावश्यक वस्तू कायदा, १९५५ च्या कलम ३ आणि ७ अंतर्गत गुन्हा दाखल करण्यात आला आहे. आरोपीला अटक करण्यात आली असून पुढील तपास सुरू आहे.
