RBI To Issue Rs 50 Rs New Notes:भारतीय रिझर्व्ह बँकेकडून (RBI) लवकरच ५० रुपयांची नवी नोट जारी केली जाणार आहे. नव्या नोटेवर आरबीआयचे नवनियुक्त गव्हर्नर संजय मल्होत्रा यांची स्वाक्षरी असणार आहे. त्यामुळे नागरिकांमध्ये या नव्या नोटेबाबत उत्सुकता निर्माण झाली आहे.
नव्या नोटेची वैशिष्ट्ये
भारतीय रिझर्व्ह बँकेने जारी केलेल्या माहितीनुसार, महात्मा गांधी (नवीन) सीरीजमधील ५० रुपयांची नोट फ्लोरोसेंट निळ्या रंगात असेल. नोटेचा आकार ६६ मिमी x १३५ मिमी असून, मागील बाजूस प्रसिद्ध हंपीच्या रथाचे चित्र असणार आहे. ही डिझाइन भारताच्या सांस्कृतिक वारशाचे प्रतीक मानली जाते.
जुनी नोट वैध राहणार
नवीन ५० रुपयांची नोट बाजारात येणार असली तरी, सध्या प्रचलित असलेल्या जुन्या नोटादेखील वैध राहतील. त्यामुळे नागरिकांनी घाबरण्याचे कारण नाही. आरबीआयने स्पष्ट केलं आहे की, जुन्या नोटा व्यवहारासाठी वापरता येतील.
संजय मल्होत्रा यांची नियुक्ती
संजय मल्होत्रा यांनी डिसेंबर २०२४ मध्ये भारतीय रिझर्व्ह बँकेचे गव्हर्नर म्हणून कार्यभार स्वीकारला. त्याआधी ते डिपार्टमेंट ऑफ फायनान्शियल सर्व्हिसेसचे सचिव होते. तसेच, त्यांनी ऊर्जा मंत्रालयातही महत्त्वाची भूमिका बजावली आहे.
कधी येणार बाजारात?
आरबीआयकडून लवकरच नव्या ५० रुपयांच्या नोटेचे वितरण सुरू होणार असल्याची माहिती आहे. मात्र, नेमकी तारीख अद्याप जाहीर करण्यात आलेली नाही. नागरिकांना नव्या नोटेबाबत अधिकृत माहिती मिळण्यासाठी आरबीआयच्या अधिकृत संकेतस्थळावर लक्ष ठेवण्याचा सल्ला देण्यात आला आहे.
बदलाचा परिणाम
नव्या नोटेच्या आगमनामुळे चलन व्यवस्थेत काहीसा बदल होणार असला तरी, व्यवहारांवर कोणताही परिणाम होणार नाही. ५० रुपयांच्या नव्या नोटेबाबत अधिकृत घोषणा होताच, बँकांमार्फत ती नागरिकांच्या हाती येईल.
👉 नवीन अपडेटसाठी आमच्या वेबसाईटला भेट द्या आणि अधिकृत माहिती जाणून घ्या!
