बारामती : महावितरणच्या २०२४-२५ आंतरपरिमंडलीय राज्यस्तरीय क्रीडा स्पर्धेत पुणे-बारामती परिमंडल संघाने दमदार कामगिरी करत २१ सुवर्ण आणि ९ रौप्य पदकांची कमाई केली. गेल्या दोन वर्षांचे सर्वसाधारण विजेतेपद मिळवणाऱ्या संघाला यंदा मात्र थोडक्यात दुसऱ्या क्रमांकावर समाधान मानावे लागले.
बारामतीच्या विद्यानगरी प्रतिष्ठान क्रीडा संकुलात पार पडलेल्या या स्पर्धेत कोल्हापूर संघाने सर्वसाधारण विजेतेपद पटकावले. पुणे-बारामती संघाने व्हॉलीबॉल (पुरुष), खो-खो (पुरुष), कबड्डी (महिला), बॅडमिंटन (महिला) या सांघिक खेळांमध्ये विजेतेपद मिळवले. विशेषतः अतितटीच्या दोन टाय झालेल्या खो-खो (महिला) सामन्यात संघाने उपविजेतेपद पटकावले.
या स्पर्धेचा समारोप शनिवारी (दि. ८) सायंकाळी झाला. विजेता आणि उपविजेत्यांना महावितरणचे संचालक (Mahavitran Director) (प्रकल्प) प्रसाद रेशमे आणि प्रमुख पाहुण्यांच्या हस्ते पारितोषिके प्रदान करण्यात आली. या कार्यक्रमाच्या अध्यक्षस्थानी पुणे प्रादेशिक संचालक भुजंग खंदारे होते. प्रमुख पाहुणे म्हणून कार्यकारी संचालक परेश भागवत, दत्तात्रेय पडळकर, मुख्य अभियंते राजेंद्र पवार (पुणे), धर्मराज पेठकर (बारामती), दत्तात्रय बनसोडे, दिलीप दोडके, पवनकुमार कच्छोट, स्वप्नील काटकर, मुख्य औद्योगिक संबंध अधिकारी संजय ढोके, महाव्यवस्थापक (मासं) राजेंद्र पांडे, मुख्य जनसंपर्क अधिकारी भारत पवार, सहमुख्य औद्योगिक संबंध अधिकारी ललित गायकवाड, उपमुख्य औद्योगिक संबंध अधिकारी श्रीकृष्ण वायदंडे (बारामती) आणि भुपेंद्र वाघमारे आदी मान्यवर उपस्थित होते.
वैयक्तिक खेळ प्रकारांमध्ये पुणे-बारामती संघाने उजळ कामगिरी केली. १०० मीटर धावण्यात गुलाबसिंग वसावे यांनी उपविजेतेपद पटकावले, तर २०० मीटर आणि ४०० मीटर शर्यतीत त्यांनी सुवर्णपदक मिळवले. महिला गटात संजना शेजल यांनी २०० मीटर आणि ८०० मीटर धावण्यात उपविजेतेपद मिळवले. अर्चना भोंग यांनी १५०० मीटर धावण्यात उपविजेतेपद पटकावले.
संघाच्या रिले प्रकारात प्रतीक वाईकर, गुलाबसिंग वसावे, अक्षय केंगाळे आणि सोमनाथ कांतीकर यांनी ४ बाय १०० मीटर शर्यतीत सुवर्णपदक जिंकले. गोळाफेकमध्ये प्रवीण बोरावके विजेते ठरले. लांब उडीत पुरुष गटात अक्षय केंगाळे आणि महिला गटात माया येळवंडे यांनी अनुक्रमे सुवर्ण व रौप्यपदक पटकावले.
टेनिक्वाईटच्या महिला दुहेरीत शीतल नाईक आणि कोमल सुरवसे यांनी उपविजेतेपद मिळवले. टेबल टेनिसमध्ये अतुल दंडवते यांनी एकेरीत सुवर्णपदक पटकावले. बॅडमिंटनमध्ये पुरुष एकेरीत भरत वशिष्ठ, पुरुष दुहेरीत भरत वशिष्ठ आणि सुरेश जाधव यांनी सुवर्णपदक जिंकले. महिला एकेरीत वैष्णवी गांगारकर, महिला दुहेरीत वैष्णवी गांगारकर आणि अनिता कुलकर्णी यांनी विजेतेपद मिळवले.
कुस्ती प्रकारात आत्माराम मुंढे (५७ किलो), राजकुमार काळे (६५ किलो), अकिल मुजावर (७९ किलो), महावीर जाधव (८६ किलो), अमोल गवळी (९२ किलो), महेश कोळी (९७ किलो) यांनी सुवर्णपदके पटकावली, तर वैभव पवार (१२५ किलो) उपविजेते ठरले.
शरीर सौष्ठव (६५ किलो) गटात विशाल मोहोळ उपविजेते ठरले. पॉवरलिफ्टिंग (७४ किलो) गटात मनीष कोंड्रा यांनी सुवर्णपदक पटकावले.
या चमकदार कामगिरीसाठी पुणे-बारामती संघातील खेळाडूंवर अभिनंदनाचा वर्षाव होत आहे.
News Title: Pune-Baramati team’s brilliant performance in Mahavitaran State Sports Championship
